چەن ڕاپۆرتێک لە کومیتەی بەرگری لە ئاژەڵانەوە

ئەو ڕاپۆرتانەی کە لە “کومیتەی بەرگری لە ئاژەڵان”ی ئەنجومەنی سەوزی چیا بە دەستمان گەیشتوە:
١- دوای نیوەڕۆی ڕۆژی شەممە ٢٨ی جۆزەردان لەلایەن “خەڵکی شارەدێی نگڵ”ەوە گەڕەک و کۆڵان و دەروبانی ئەو ژینگەیە خاوێن کرایەوە. بەشداری کردنی ٣٠-٤٠ کەس لە ژینگە پارێزانی ئەو مەڵبەندە جێگای سەرنجی هەموان بوو.
٢- لە مانگی گوڵانی ئەمساڵدا سێ هێلانە باڵندەی “تەیری پەڕەسیلکە” کە بەهۆی خانوو تێکدانێکەوە لە ئاوایی کانی سانان دا ڕووخێندرابوون؛ بەبۆنەی ئەمەگداربوونی خاوەن ماڵەوە ٩ بەچکە تەیری زەڕنەقووتەو تووک کردووی ئەم سێ کاڤۆکە لە لایەن بنەماڵەی ئەندامی سەوزی چیاو ژینگەپارێزی کاک “سەید ئەحمەدی حسەینی”ەوە بەخێو کران و زۆربەیان باڵە فڕە کران.
٣- لە مانگی جۆزەردان لە لایەن “کاک بەختیار مەولانی موتڵەق، کومیتەی ئەنجومەنی سەوزی چیای کانی دینار”ەوە چوار بەچکە “فشەی کێڵگە” کە هێلانەکەیان وە بەر بڕەی گیادووری تراکتۆر(مۆڤێر) کەوتبوو، پەنا دران و بەخێو کران. تەنیا یەک دانەیان نەبێ کە باڵی زامدار ببوو، باڵەفڕە بوون، زامدارەکەیش برینەکەی لە ساڕێژ بووندایە.
٤- لە نیوەی سەرەتای مانگی جۆزەردان لە لایەن “سێ مامۆستای بە ئەمەگ و ژینگەوانی فێرگە”وە لە ستارگەی دەشتی بێلوودا، بەچکە “لەقلەقێکی” تازە باڵەفڕە بوو، کە سینگی بەسیمی دڕکاوی هەڵدڕابوو؛ بە برینی کولاوەوە ئەهێنرێت بۆ “دەرمانگەی چارکوتانۆکی” دوکتور مەسعوود موستەفا سوڵتانی . دوای فرمانی نەشتەرگەری، بارودۆخی ئەم بەچکە لەقلەقە بەرەو باشبوون رۆیشت و لە مێرگەکانی زرێباردا فڕینی دەست پێکردەوە.
٥- لە دەیەی دوایی جۆزەرداندا لە لایەن “دارای خاوەری، ئەمیر مەهدیزادە، سەلام وەتەندووست ١١ ساڵان و مناڵە هاوگەڕەکەکانیەوە” لە دێی کانیسانان، “سێ بەچکە پشیلە” کە دایکەکەیان بە ماشین تیاچووبوو پەنا ئەدرێن. دوانیان ماونەتەوە و ئێستا بەخێوی ئەکەن.
٦- لە رۆژی دووشەممە ٦ی پووشپەڕ لەقلەقێ کە بە تەلی بەرق، تەزوو پڕووکاندبووی، لە لایەن “کاک داود خاوەری ئەندامی چیای کانیسانان”ەوە پەنادریا و دوای تیمار کردن بۆ سرووشت گەڕایەوە.
٧- لە سەرەتای پووشپەڕدا لە دێیەکی هەورامانی دهۆن “کارژەلەیەکی بزنەکێفی” کە کەوتبوەوە ناو ئەستێری ئاوی باخێکەوە لە لایەن “مامۆستایەکی فێرگە”وە لە خنکاندن رزگار ئەبێت و دوای وشکەوە کردن؛ ئەبێتەوە بۆ کاوی کەڵەنانی کەڵەکێوییەکان و بەرەڵڵا ئەکرێت.
٨- لە رۆژی دووشەممە ٢٥ی گەلاوێژی ساڵی رابردوو لە نزیک ملەی چاوگدا، “کەوباڕ”ێک کە لە ترسی هاشاوڵی ئاگر و نرکە و فڕەی باڵەفڕەکەی ئاگر کوژاندنەوە، پاترابوو، لە لایەن “کاک سەعیدی نیکڕەفتار”ەوە داڵدە ئەدرێت و دوای کولە ئاژت کردن و تێپەڕاندنی ١٠ مانگ لە دەشتیاری؛ بوو بە کەوێکی گەورە و لە کاتی مێڕۆژی ئەمساڵدا بەردرایەوە ناو سرووشت و ستارگەکانی ناوچە.
٩- لە ڕۆژی پێنجشەممە ٢ی پووشپەڕ تێکۆشانی ئەندامانی چیای ئاوایی دەرەتفێ بۆ چارەی “بەچکە لە‌قلەقێک” کە بەر تەزووی وزەی برق کەوتبوو ئاکامی نەبوو، دوای دەرمان کردن ئەو باڵندەیە بە داخەوە تیاچوو.