“چالاکی ئەنجومەنی ژینگە پارێزیی وڵات لە شاری بۆکان بە بۆنەی ڕۆژی هەوای پاک”

ئەنجومەنی ژینگە پارێزیی وڵات له شاری بۆکان له درێژەی چالاکییەکانی بە بۆنە ڕۆژی هەوای پاک، لە ناو شاری بۆکان بە هاوکاری هەیئەتی دووچەرخە سواری شاری بۆکان له کارێکی هێمایی و نمادین دا، مانۆڕێکی دووچەرخە سواری، بە دروشمی”هەوای پاک و بێگەرد ناتوانین بکڕین، بەڵام دەتوانین وە دەستی بێنین ” بەڕیوە برد. لەو چالاکییەدا کچانی ژینگە پارێزی وەرزشکاری ئەنجومەنی وڵات بەشداری بەرچاویان بوو و پێشەنگی ئەو چالاکییە بوون.
جێی ئاماژەیە شاری بۆکانیش هاوشێوەی شارەکانی دیکەی ئێران، بە بۆنەی کەڵکوەرنەگرنتی خەڵک لە وەسایلی هاتووچۆی گشتی و هاتووچۆی لە ڕادە بەدەری ئوتۆمبیلی شەخسی و تەک سەرنشین،بە دەست تڕافیک و پیس بوونی کەش وهەواوە دەناڵێنێ و ئەنجومەنی وڵاتیش بەوکارە دەیەوێ فەرهەنگسازی بۆ کەڵک وەرگرتنی زیاتری جەماوەر لە دووچەرخە و وەسایلی هاتووچۆی گشتی،بکەن.
ئەم چەشنه کارانه که ئەنجومەنی ژینگەپارێزیی وڵات بەڕێوەی دەبات به مەبەستی فەرهەنگسازی و ئاگادارکردنەوەی خەڵکە له بەرامبەر لایەنه جۆراوجۆرەکانی ژینگە و هەروەها هەنگاوێکە بۆ هۆشیارکردنەوەی کۆمەڵگا بۆ ئەوەی ئاگاداربن هەوای شارەکان له مەترسی پیس بووندایه و هەر تاکێک بەرپرسیارە ودەتوانێ ڕۆڵی خۆی له کەمتر پیس بوونی هەوا ببینێ.
نێردراو: فەرهاد لوتفی ئەندامی ئەنجومەنی ژینگە پارێزیی وڵات