سماییل ئەمینی
– زارۆڵە ئازیزەکام؛ پاسەدیارا ڕاۆچیەکێ ئارۆ دیارشا نیا, دەی؛ زاخەکانە, چێرو تاشەکانە, بەیدێ بەر، پەی وێتا گێڵدێ، بڕەمدێ، یۆترینی تار بنیەیدێ، پڕدێ کۆڵێ هەنتیرنیەرە.
خۆ وێتا مزاندێ، بکۆژەکێ ئێمە حەز مەکەرا ئێمە وەشمابۆ, حەز مەکەرا چی یاڵە بەرزاوە تەماشەو دنیای کەرمێ, حەز مەکەرا فێنکی هەوای بڵۆ دەماخمارە.
ئارۆ ڕێوی فرە وەشا. گردێما ئازادێنمێ. بەیدێ گندێ شۆنۆ ئەدەیتا، تا یاگە وەشەکاو کۆساڵانیتا پنە نیشانە دەو. بەیدێ شۆنیمەرە بلم پەی ئایاگە بەرزا تەماشەو سیروانی ئازیزی کەرمێ. وێتا مزاندێ ئینە فرە درێژخایەن نیا، کەسانێو ئینەی چی دەگایانە حەزمەکەرا جە هامسایەتی چنی ئێمە. ئێمە ئادێما فرە وەش مسیا بێ ئادیشا تاقەتما نیا.
ڕۆڵە ئازیزەکام دەورانوو زووی گێڵنێنێوە تاتەو کەسووکارشا فرە عالێ بێنێ، ئەینێ کەشەنە بەدەنگی بەرز گۆرانیێ واچێنێ, سیاوچەمانە چڕێنێ, بە وینەی ئێمە کەیفشا هۆرزێ. زانێنێ چەنی چنیما هۆرزو ئەرەنیشت کەرا. سەروو هانێویەوە پێوە ئاوی وەرێنمێ تەرسیما چنەشا نەبێ، ئازارما نەیاونێنێ لا, وەروە فرە وارایا هیچما دەس نەکەوتایا لوێنمێ پاڵوو یانەکاشا ,چێوما دێنێ پنە.
– ڕاسی ئەدا گیان ئانە باسوو کەی کەری؟ ئێ قسێتە ڕاسێنێ؟ یاشۆخیما پنەکەری؟ ئەی چی ئیسە پاسێ نیەنێ؟ چی ڕەحما پنە مەکەرا؟ چی کۆشاما؟
– زاڕۆڵە ئازیزەکام جارێو خەریکو گەردەخلوو وێتا بیدێ. خوا گەورەن بەشکووم وزۆ دلێ دڵوو ڕاوچیەکا ئێتر وازما چنە بارا. ئێتر نەکۆشاما. تارما نەنیا وەشەویسەکام جارێو ئی فکرا مەکەردێ فۆرسەتا دەی کایە کەردێ.
زاڕۆڵەکێ دوورێ کەوتێوە، ڕەمێنێ شۆنۆ هەنترینیەرە، ئی تەوەن پەی ئەو تەوەنێ، ئی شاخ پەی ئەو شاخی، ئەداشا سەرو تاشێوی گەورەی هاگاش چنەشا بێ نەکای کتووپڕ فۆرسەت بوازاو لوولوۆ تفنگەکاشا گێرانە.
ناوەخت دلێ تاشەکانە چەمش کەوت بە چن غەریبا کە کەمینشا کەردەن، هاوارش کەرد:
– گێڵدێوە، بەیدێوە، وێتا دوور وزدێوە، گیانتا ئینا خەتەرەنە،
واڵە و بڕاڵە جگە ئازادی, جگە وەشی، جگە ڕەمەی، هاگاشا لا هیچیەوە نەبێ، دەنگوو ئەدالێشا نەژنەویە، نزیکێ کەوتێوە، ناخافڵ تەقە کریا داروو دەوەن هاوارش هۆرس،
دیسان، دیسان کۆشیا، دیسان ونیی مجیا، دیسان جەرگوو ئەدای بڕیا، دیسان واڵە و بڕاڵە تاقێ کەوتێ.
ئاداشا چەمش چنەبێ زاڕۆڵه نازارەکەش تلش وارد, ونیش پژگیا، تەوەنەکێ کۆساڵانی دیسان بە ونۆ نازارا سوورێ بیێ، ڕاوچیەکێ لوەی سەروو سەرەو بڕاڵە گۆلالەی سەرەشا بڕیی، بە وەشیەوە داشا ملوو شانەیشارەو ڕووبەدەگا کەوتێ ڕا.
سیروان بەونۆ بەچەکەڵوو کۆساڵانی ڕەنگەش واڕیا، داروو دەوەن چەمشا چنەبێ، هەرسیشا متێ، ئا بێ ڕەحمێ واڵەو بڕاڵەشا جە یۆی کەردێ. واڵێ بە کزی ئاماوە پەی لا ئەدەی واتش:
– تۆ قەولت دا واتت ئارۆ نیەنێ، واتت بڕەمدێ، واتت کۆساڵان ئاراما، دەخۆ مەناوە وێم تەنیا ئێتر چنی کێ شۆخی کەروو؟ شۆنۆ کێره بڕەموو؟ تاوانوو براڵە گیانەیم چێش بێ؟
– چی نمازا وەشما بۆ؟ چی نمازا ئازادێ بیمێ؟ وەشەسیاو ئەدالێ دەی چێش کەروو؟ ئانا نمازا پی بەرزایاوە بژیومێ، یاڵەو یاڵ کەرمێ، تۆ واچی نەیا سەروو ڕەی ڕاسەی؟ حەر پاسە ئازادیشا پەی وێشا گەرەکا، پەی ئێمەیچ ڕەواش بزانا، حەر پاسە ژیانشا وەش مسێۆ، بازا ئێمەیچ پەی وێما بژیومێ!
– هەی زاڵمەکا چی زاڕۆڵەو وێتا وەش مسیۆ، ڕەحم بە زاڕۆڵەو من مەکەردێ؟ چی وژدانتا کۆشیانەوە؟ چی مەزاندێ هامسایەتی یانێو چێش؟
ئی بابەتەی جە شومارەو 16ی مانگنامەو چیا چاپ کریان
ثبت دیدگاه